الأخوان كسرو لى كاميرتى عند لجنة الأنتخابات

 

قبل ما اقول انا عندى الفيديو بس طبعا نصه بقى صوت من بعد ما مسكوا الكاميرا شان مش محتاجة تخوين من اى حد

فضلت فترة بفكر انزل انتخب ف الأعادة ولا خلاص هى اتحسمت خاصة مع الأحداث الاخيرة لمجلس الوزراء
بعد تفكير كتير اوى قررت انزل انتخب وكمل للأخر
وبعد وصولى لجنة أنتخابى (مدرسة أم الأبطال التجريبية) دخلت اللجنة وبطلع البطاقة ملاقتهاش ف شنطتى سألت الظابط قلتله انا مش معايا البطاقة ينفع كرنيه النقابة ؟؟ قلت يمكن ينفع او المرة التانية ممكن مش محتاجينها وقلتله كمان انى حافظة رقم بطاقتى لو عايزين تتأكدوا
المهم الظابط قالى ان الموضوع دا مش معايا روحى لرئيس اللجنة
قلتله لأ خلاص انا هروح أجيبها من البيت

اول ما خرجت من المدرسة لاقيت أخويا صدفة لسة واصل وهيدخل ينتخب

فقلتله ادخل وانا هستناك هنا لحد ما اتخلص

بعد دخول اخى المدرسة كنت ملاحظة كام بنت من اللى لابسين الخمار والنقاب واقفين بيوقفوا كل سيدة او رجل داخل اللجنة وبيقولوله انتخب "جمال العشرى" احد مرشحين االفئات حزب الحرية والعدالة بدائرة تانية جيزة فردى

فروحت لواحدة منهم وقلت لها : انتى واقفة هنا ليه ؟؟
قالتلى : انتى واقفة هنا ليه

قلتلها : انا داخلة انتخب وانتى ؟

قالتلى انا واقفة بورى الناس اللجنة (مع اننا ادام باب المدرسة والمدرسة الاخرى بابها بعد الباب دا بخمسة متر مثلا) وبقولهم اساامى كل الناس اللى نازلة الاعادة

قلتلها : بس انتى مش بتعملى كده

قالتلى : لأ بعمل كده

قلتلها : معلش أنتى كدابة

طبعا أذبهلت من جراءتى وانى اتهمها بالكذب

قالتلى : مش بكذب
وصدفة ولحسن حظى وسوء حظها خرجت سيدة مسنة من اللجنة وجات تقولها : انا اخترت اللى انتى قولتيلى عليه

فقلت للسيدة : هى كانت قيلالك مين ؟

قالت السيدة : جمال العشرى

وساعتها البنت اللى كنت بكلمها مكنتش عارفة تقول ايه رغم ان الموضوع مش محتاج لكدب ولف ودوران

وحينها بدأت اطلع الكاميرا بتاعتى عشان اصور الأانتهاك دا

وانا بقولها : إيه رأيك بقى ف اللى قالتله

قالتلى : ما تروحى تشوفى كمان اللى تبع :"محمد فؤاد" ودا المنافس لجمال العشرى

قلتلها : هما كمان المفروض يمشوا وكمان هما بيعملوا حاجة غلط ليه انتى يا ملتزمة يا متدينة تعملى زيهم ولا انتى لابسة دا صورة- قلتلها عامة انا هصور اللى بيحصل

قالتلى: صورى

وطبعا وقفت زميلاتها صامتين وفجأة اتكلمت واحدة تانية منهم قالتلى هى عملت ايه : قلتلها هى بتقول للناس انتخبوا فلان ليه دا يحصل هل دا صح

قالتلى : انتى معاكى تصريح بالتصوير ولا انتى تبع انهى جريدة (ودا لكبر حجم كاميرتى فتخيلوا انى صحفية )

قلتلها : وانتى معاكى تصريح انك تقفى هنا وتعملى كده ؟؟؟

وطبعا كلهم كانوا ادوا ظهرهم للكاميرا

وفجأة لاقيت رجالة مرة واحدة ملمومين عليا وتلاتة منهم منعونى من التصوير وكل واحد من التلاتة كان ماسك جزء من الكاميرا بيشد فيها بعنف شديد

وحاولت كتير اخليهم يسيبوا الكاميرا مش راضين ومصممين على كسرها

وقلتلهم انتوا ايه الفرق بينكم دلوقتى واللى بتعملوه معايا وبين اللى بيحصل ف التحرير ؟؟!!!!

ولا واحد من اللى واقفين حاول يمنعهم ولا يحوشهم عنى وعن الكاميرامع العلم ان بجوار باب المدرسة فى كشك شرطة مرور وكان فيه عقيد على ما اعتقد دا غير أمناء الشرطة والعساكر وغير عسكرى الجيش اللى واقف على باب المدرسة من جوا واعتقد صوتى وصل لأخر الشارع وانا بصوت عشان يسيبوا الكاميرا

لدرجة ان اخويا خرج لما سمع صوتى وخلاهم سابوا الكاميرا طبعا بعد ما كسروها L

وطبعا لاقيت شعب مصر العظيم اللى جاى يتفرج لسة واقف بيتفرج بكل برود ولا مبالاة للى بيحصل

واول ما اتلفتنا انا واخويا ملاقيناش ولا واحد من اللى كانوا واقفين بيحاولوا يكسروا الكاميرا ولا البنات ولاقينا الناس اللى بتتفرج اللى معظمهم كان بيتهمنى انى كدابة وان محدش كلمنى ومحدش عملى حاجة

ومنهم اللى قالى انتى مالك ما يعملوا اللى عايزينه انتى زعلانة ليه

وأخرين يا بنتى احمدى ربنا وامشى لحد كده

واخرين روحى اعملى محضر ف القسم او عند شرطة المرور دى ( اللى المفروض بين مكان اللى حصل وبينهم مترين تقريبا )

وكان فى كام بنت منتقبات كل اللى كانوا بيقولوه انتى معاكى تصريح عشان تصورى اصلا انتى اللى غلطانة ومش من حقك تصورى

قلتلها وانتى بقى لما تشوفى حرامى بيسرق ف الشارع هتروحى تجيبى تصريح الاول قبل ما تصوريه ولا تمسكيه

الله يخليكى أقلعى اللى انتى لابساه دا لانه مش لايق عليكوا وانتوا عارف عليه يا اهل الدين والألتزام

ومنهم واحدة وحيدة كانت شايفة اللى حصل من الأول وعمالة تشجعنى وتقولى برافو عليكى انتى صح مش من حقهم يعملوا كده : اللى اول ما قلتلها تيجى تشهدى على اللى حصل قالتلى معلش انا مش فاضية ( رغم انها عارفة ان فى خطأ واعترفت بيه لكنها اجبن من انها تكمل او تاخد موقف )

وطبعا لا حياة لمن تنادى فضلت اصورت واهاتى كتير ف الشارع واقول لو راجل اوى زى ما كسر الكاميرا يرجع تانى

لو هو فعلا على حق يرجع تانى

وكل دا واخويا بيحاول بأقصى جهده انه يخلينى اروح ولكن انا مش راضية

ف أخر الموقف كانت وصلت بنت وشافت اللى حصل وكلمتنى بعد ما احد الاشخاص زعق للناس انهم هيمشوا بدل ما هما واقفين بيتفرجوا كده

وطلعت انها صحفية واخويا شاف تصريحها وبطاقتها وطلبت منى رقمى وخدت كل كلامى وسألتنى هل عندى مشكلة ف انى اكتب اسمى مع المقالة ولا لأ وطبعا قلتلها لأ معنديش مشكلة

ودخلت لرئيس اللجنة اللى احنا واقفين ادامها وقلتله اللى حصل والراجل قالى كلمتين اساسهم انى اعمل محضر بس قالى :

اولا لو هتعملى محضر عشان الكاميرا مش هتستفيدى حاجة

ثانيا لو هتعملى محضر عشان الانتهاكات فروحى اعمليه ف القسم وروحى بالمحضر للجنة العليا للانتخابات وخاصة انك معاكى فيديو

لكن لو كنتى جيتى ساعتها كنت قبضت عليه

قلتله حضرتك دا كان دلوقتى حالا لكن هما مشيوا

فخلى واحد عسكرى يخرج معايا ووقفنا فترة بره ان حد منهم يرجع وطبعا مش هيجوا

طبعا كان المفروض اعمل محضر وان شاء الله هعمله وربنا يكرم – لكن بطاقتى طبعا كنت قلت انها مش معايا ومش هينفع من غيرها

ومشيت وانا نفسيا مدمرة ومحبطة بشكل كبير لدرجة انى كنت ببكى وانا ف الطريق ولدرجة انى مقدرتش اروح البيت وانا كده مش بس عشان الكاميرا

لكن اللى تاعبنى اكتر الناس اللى كانت حواليا كانوا كتير ولا حد منهم وقفوا معايا ولا حاولوا يدافعوا عنى

كلهم كدبونى وغلطونى انا !!!

بجد تعبانة اوى ونفسيتى زى الزفت من الناس

الناس اللى بتموت ف التحرير دى والله بتموت عشان ناس تانية معظمهم ميستاهلش وضفر من اللى بيموتوا دول برقبة الف واحد من عينة اللى كانوا واقفين النهاردة L

حسيت بجد اد ايه الناس متبلدة المشاعر وبقى عندهم حالة لا مبالاة لا توصف

---------

بعتزر عن اى خطأة مطبعى ف كلامى انا لسة واصلة من بره وتعبانة فوق ما اى حد ف الدنيا يتخيل بس كان نفسى اوصل اللى حصلى للناس واحكى اللى جوايا لانه بجد تاعبنى اوووووووووووووووووووووووووووووووووووووى

قهـــر الخـــوف

أحيانا بنحس أن أحلامنا وطموحاتنا أكبر بكثير من أننا نحققها أو نوصلها
لكن لازم نستمر ونكمل ونحلم مهما كانت أحلامنا بعيدة أو شايفين ان الطريق طويل للوصول ليها
خليك واثق من أنك ف يوم من الأيام هتخلى الحلم اللى شايفه صعب يتحقق يبقى حقيقة أدامك
نعيب زماننا و العيب فينا "
و ما لزماننا عيب سوانا
و نهجو ذا الزمان بغير ذنب
و لو نطق الزمان لنا هجانا
فدنيانا التصنع و الترائي
و نحن به نخادع من يرانا
و ليس الذئب يأكل لحم ذئب
و يأكل بعضنا بعضاً عيانا"
هتعدى الأيام والسنين وهيجى يوم جديد هيشهد عليك وعلى أعمالك اللى حققتها لحد ما جه اليوم دا هيسألك فين الجديد اللى عملته فين السعى اللى سعيته.. وليه مجددتش وليه مسعتش عشان تقدر توصل لحلمك وتحققه
هيسألك:
إيه أخبار أحلامك؟؟
إيه أخبار طموحاتك؟؟
إيه أخبار الإنجازات اللى أنجزتها؟؟
هل اللى وصلتله دا هو اللى أنت عايزه ولا لأ ... ولو لأ فهتفضل لأمتى بتأجل ف حلمك وتبدى أعذار لأمتى هتفضل ضعيف وخايف .. هتفضل ضاااااااااااااايع لحد أمتى؟؟؟
وساعتها ردك هيبقى
"أنا عايز أبقى ... بس ..........." وأول ما تقول بس دى هتبتدى بقى تخلق ف أعذار وأسباب وهمية ف خيالك انت بس هتقول المكان والزمان والظروف والجوابات كل دا سببه ضعفك وخوفك
فين الثقة بالنفس ؟؟؟
فين الامل؟؟
لا تستسلم للفشل
لا تحمل عدم تحقيق حلمك على شماعة الأسباب والظروف
أؤمن بذاتك وقوتك وانك تقدر تعمل كل ما يقال عليه المستحيل
جه الوقت لقهر الخوف
جه الوقت عشان تتحمل المسؤولية
جه الوقت عشان تعمر الأرض
جه الوقت اللى هيبقى فيه الحلم حقيقة أدامك
أقولك على حاجة حلوة
قرر التغيــــــــــــــــــــــــر
أبدأ بنفســــــــــــك أولا
--------------------------
نهى بسيونى
31-3-2011

إزاى أوصل للمرحلة دى؟وإيه هى الوسائل المطلوبة عشان أعمل دا؟ (التخطيــــــــط 4)

بعد ما كل واحد حدد مكانه وهو فين دلوقتى .. وحدد كمان المكان اللى عايز يوصله وطموحاته ف المستقبل

عايزين بقى نعرف وسيلة المواصلات اللى هنروح بيها من المكان اللى إحنا فيه للمكان اللى عايزين نروحه

والنهاردة بقى هنرد على تالت سؤال ف التخطيط وهو:

إزاى أوصل للمرحلة دى؟وإيه هى الوسائل المطلوبة عشان أعمل دا؟

"إذا لم تكن تعرف إلى أى شىء تطمح فإنك تطمح إلى لا شىء"

يعنى من الأخر كدا لازم تعرف ترد على السؤالين اللى فاتوا عشان تقدر تكمل

ولو معرفتش تعمل دا .. يبقى انت إنسان بلا طموح وبلا أهداف

والإنسان اللى بلا أهداف <<<< إنسان ميت

تحب تكون إنسان ميت .. ملكش دور ف الحياة

تحب تكون إنسان غير مؤثر ف الحياة .. ويوم ما تموت يبقى متكونش سايب وراك أعمال الناس تفتكرك بيها

طيب عشان منبعدش كتير عن موضوعنا ... إحنا من دلوقتى هنبتدى نركز من دلوقتى على خطوات تنفيذ الخطة وعملة المراقبة عشان نعرف إحنا ماشين صح مع الخطة ولا لأ وعملنا أد ايه منها وبالشكل المطلوب ولا أقل ولا أعلى .. وكمان عملية التنظيم وإزاى نواجه اى تقصير ممكن يحصل أو الطوارىء اللى ممكن تواجهك أثناء تنفيذ الخطة وإننا نحط البدائل اللى ممكن نستخدمها ف الحالات دى.

خطة التنفيذ:

دى بقى وثيقة العمل وضرورية جدا .. ولازم نحط خطة مفصلة لكل نشاط هتقوم بيه لوحده.يعنى كل نشاط يبقى ليه خطته .

طيب هنحدد ف الخطة دى إيه؟؟

هقولك :

1- الأهداف الإجرائية .... ودى شرحناها قبل كدا وقلنا يعنى ايه هدف إجرائى.

2- نحدد البداية والنهاية بالتقريب للعمل دا.

3- نحدد معاد نهائى تقريبى للخطة دى.

4- تربط الجدول الزمنى بكل الخطط والأعمال دى مع بعض...ودا لازم ومهم أوى عشان تنفذ صح بدل ما الوقت هو اللى يبقى العائق أدامك .. فلازم تعمل حسابك ف تداخل الوقت خاصة لما تشتغل ف تنفيذ أكتر من عمل ف نفس الوقت.

5- تقدر التكاليف الأجمالية لتنفيذ كل عمل.

6- تحدد الأولويات وترتيب الأعمال .. ودا طبعا إتكلمنا فيه قبل كدا وقلنا إزاى نحدد الأولويات دى.

7- الأهم بقى من كل اللى فوق دا ... إنك تكتب الخطة .. وأوعى تعتمد على الذاكرة ابدا مهما كانت ذاكرتك قوية.

مراقبة الأنشطة :

أهم جزء ف الخطة هو انك تراقب اللى بتعمله

عشان نراقب الأنشطة نعمل ايه؟؟

1- لازم تواظب على اللى عملته يوم بيوم .. عشان تعرف إنت أنجزت أد ايه وناقص ايه.

2- لازم تحط بدائل عشان لو حصل طوارىء أو إحتجت تغير الخطة.

3- لازم تتصرف بسرعة لو حصل أى خلل أو اى حاجة غير متوافقة مع الخطة.

4- لازم تجدد ف المخطط بتاعك كل فترة.

تنظيم الأنشطة:

أكثر الطرق فاعلية هما الخطة السنوية والمفكرة اليومية

الخطة السنوية <<< دى بيبقى فيها الأنشطة الأساسية اللى بتبين المهمات المختلفة ومدة تنفيذها ومواعيدها وانتهاءها .

المفكرة اليومية <<< دى بيبقى فيها الأعمال بشكل يومى أو اسبوعى وبتوضح فيها المهمة والتاريخ ومين هيقوم بيها والأمور اللى بيربط بيها.

إزاى بقى نواجه إحتمالات الطوارىء وإزاى نتغلب عليها؟؟؟؟

عشان تقدر تواجه المشاكل الغير متوقعة اللى ممكن تقابلك لازم :

1- يكون جدولك الزمنى قابل للتعديل.

2- تكون مستعد نفسيا لمواجهة الطوارىء .. ومتوقع حدوثها كمان.

لما تقف أدامك مشكلة إبعد نفسك عن إنك تبنى وتتخيل المواقف عن طريق أفكار ومواقف سابقة .. واتعرف على حقائق الموقف ورتبها وخد القرار الأكثر عدلا وإتمسك به.

قدرتك على انك تحفظ إتزانك وتسيطر على مشاعرك وردود أفعالك عند المصائب والمشكلات وف حالات الطوارىء هى العلامات الحقيقية للقيادة.

لو لاقيت ان مستوى تطورك مش كويس زى ما كنت عايز لازم تعالج الأمور وبسرعة كمان... وأوعى تفتكر انك لما تتجاهل المشكلة إن دا هيحلها .

طيب يعنى ايه نحافظ على السيرطة ف المواقف؟:

1- متخليش الأمال والمتغيرات تتحكم فيك.

2- متبدأش بطموحات كبيرة متقدرش تحققها عشان ميحصلكش إحباط ويخليك متقدرش تكمل.

3- إنك تعرف إزاى بتمشى الامور ف حياتك دا أول الطريق إنك تقدر تسيطر على المواقف.

أوووووووووووووووووووووعى تنسى ............. إن من غير ما تعرف إنت فين ووضعك الحالى إيه.. مش هتقدر تحافظ على السيطرة.

لو نفذت كل اللى فات دا بالضبط هتقدر انك تحط خطه وتنفذها صح وكمان تقدر تتابعها عشان تعرف انت عملت ايه وفاضل اد ايه .. وهل انت ماشى صح مع الخطة ولا فى تغير لازم يحصل وبسرعة .

نهى بسيونى

6 – 2 – 2010

أنا عايز أوصل لفين ؟ وإيه هى طموحاتى للمستقبل؟ (التخطيــــــط3)

النهاردة بقى إن شاء الله هنرد على تانى سؤال ف النوت بتاعة التخطيــــــــط :

http://changeurlifenow.blogspot.com/2010/02/1.html

وهو

أنا عايز أوصل لفين ؟ وإيه هى طموحاتى للمستقبل؟

أكتر حاجة بتخلى الإنسان ينجح ف حياته .. دا إذا مكنتش أساس النجاح دا . هو قدرته على تحديد أهدافه اللى عايز يوصلها

"إن لم تبنى قلاعك فى الهواء فلن تبنيها فى أى مكان أخر"

"إذا لم تكن تعرف إلى أى شىء تطمح ... فإنك تطمح إلى لا شىء"

طيب تفتكر ليه تحديد الأهداف ليك هو أساس نجاحك

هقولك ليه

لأنها بتخليك تحط أدامك مهام وواجبات معينة تجبرك على إنك تفكر إزاى توصلها وإزاى تحققها

طبعا فى أهداف كتييييييييييييييييرة وكمان بتختلف من شخص للتانى زى وضع الشخص دا وقدراته وإهتماماته زى مثلا:

1- إنك تكمل دراسة حاجة معينة.

2- إنك تتعلم العلم الشرعى .

3- الزواج.

4- تلاقى وظيفة معينة.

"إن العالم يفسح الطريق للمرء الذى يعرف إلى أين يذهب"

يعنى إيه هدف؟؟

هدف يعنى حاجة معينة عايز الشخص يحققها . وممكن يكون هدف عام أو خاص , كبير أو صغير , نافع أو ضار.

أيوا نافع أو ضار ... تابع اللى جاى وإنت تعرف :D

يعنى إيه حاجة معينة؟

يعنى مثلا :

لما طالب يبقى عايز يكون مهندس (دا هدف معين).

لما موظف عايز يبنى بيت (هدف معين).

لما شخص يبقى عايز يحفظ المصحف (هدف معين).

"وتكبر فى عين الصغير صغيرها ... وتصغر فى عين العظيم العظائم"

فى 3 مستويات من الأهداف:

1- أهداف عامة: أمنيات وطموحات .

2- أهداف مرحلية .

3- أهداف إجرائية سلوكية : خطوات العمل.

التلات مستويات اللى فاتوا دول هو إنك بتحدد الهدف الأول (عام) وبعدين تبتدى تقسمه لمراحل أو تحدد بالضبط إيه ممكن يخليك توصلل للهدف العام دا (مرحلية) لحد ما يوصل ويبقى خطوات تتنفذ (إجرائية سلوكية) . وإن شاء الله تدرب على إنك تعمل دا لحد ما توصل لأهداف أكثر تحديدا ووضوحا عشان يبقى سهل تتنفذ.

هل أحط أى هدف وخلاص .. بأى شكل .. وأعرف منين هى تنفع تتنفذ ولا لأ ؟؟

عشان تقدر تحقق أهدافك لازم ف الأساس إن الأهداف دى تكون

1- واضحة .

2- محددة وإجرائية (زى ما قلنا من شوية أكثر تحديدا ووضوحا).

3- طموحة : يعنى يكون على فدر من الطموح على المستوى الشخصى والإجتماعى والدينى (عرفنا بقى كدا إن الهدف الضار مينفعش يبقى هدف) - يعنى واضح الفايدة منه وميكونش تافه وغير مفيد – يعنى يحقق النتايج اللى عايزها. أمثلة: أ- رب أسرة عايز يوفر سكن مناسب لأسرته. ب – طالب عايز يوصل انه يكون الأول على الدولة.

4- عملية : يعنى يناسب تركيبة الشخص النفسية والفكرية – يعنى يراعى مستوى الشخص الإيمانى والتعليمى والإجتماعى – يعنى يناسب قدرات الشخص نفسه وإمكانياته ووضعه الشخصى.

كدا فهمنا يعنى إيه هدف وإزاى إننا نقسم هدفنا لخطوات ممكن ننفذها ... ونقدر دلوقتى كل واحد يحط أهدافه اللى عايز يحققها ويعملها فى جدول ويحدد الأهداف الرئيسية ويحولها إلها أهداف مرحلية وبعدين إلى أهداف إجرائية.

فى الغالب أهداف وحاجة كل إنسان ســـــــــوى مبتخرجش عن 4 حاجات هما :

1- حاجات روحية.

2- حاجات إجتماعية.

3- حاجات مادية.

4- حاجات عقلية.

والأربع حاجات دول مشتركين مع بعض .. يعنى مش منفصلين بل مترابطين ومتداخلين ف نفس الوقت .. يعنى ممكن واحدة منهم تؤدى للتانية

وبعد ما حددت أهدافى اللى ممكن تطلع أكتر من حاجة وكمان ممكن تطلع حاجات كتيرة أوى .. أعرف بأنهى واحد ابتدى ؟

الأمور ف حياتنا بتنقسم من حيث الأهمية والإستعجال إلى 4 أقسام :

1- عـــاجل و مــهم.

2- عـــاجل وغير مــهم.

3- غيرعـــاجل و مــهم.

4- غيرعـــاجل وغير مــهم.

ولو أعدت تدور على حاجة خامسة مش هتلاقى :D

1- عاجل ومهم : ودا بيمثل الأمور العاجلة والمهمة فى نفس الوقت – بيديك إحساس دايما إنك مشغول وشعور كاذب بالأهمية ودا بسبب إنك دايما فيه بتعالج الأزمات اللى بتحصل والطوارىء.(( أزمات – مشاكل - مشروعات ليها وقت معين – إستعدادات - - ودا إسمه مربع الإدارة))

2- عاجل وغير مهم : معظم الأنشطة اللى فيه بتخص ناس تانية أو بيبقى ليها علاقة بناس تانية أو بيكون أولويات غيرنا مش أولوياتنا - فيه بتبقى دايما عندك شعور كاذب إنك بتشتغل ف عاجل ومهم . (( مكالمات - تقارير وبريد - زيارت وإجتماعيات - - ودا إسمه مربع الخداع.))

3- غير عاجل ومهم : بيبقى فيه الأمور المهمة بس مش الملحة ف وقتها - بيكون فيه التخطيط طويل الأجل لأنه غير عاجل يعنى غير محدد بوقت – أمور هامة بس ف المستقبل مش ف الوقت الحالى – أمور مش بتتحكم فينا بل إحنا اللى بنتحكم فيها .(( استعداد للمستقبل - تخطيط وتطوير - تنمية ذاتية - منع حدوث مشكلات متوقعة - - ودا إسمه مربع الجودة والقيادة.))

4- غير عاجل وغير مهم : أمور بتلجأ ليها لما تخاف من ( الأمور العاجلة والمهمة و الامور الغير عاجلة والمهمة) - بيديك سعادة وهمية نتيجة الفراغ والحاجات المش مهمة اللى بتتعمل . (( إضاعة وقت - أنشطة غير مفيدة - - ودا إسمه مربع الضياع))

بكدا إنت تقدر تحدد أهدافك من حيثت أهميتها ومين اللى يتعمل الأول ومين هو اللى لازم يتحقق الأول

وممكن كمان بجانب التحليل السابق اللى من حيث أهمية واستعجال الأمور ممكن نستعين بتحليل اللمحة السريعة أو الـ SWOT Analysis

اللى شرحناه ف النوت دى

أين أنا الان ؟ وما هو وضعى الحالى؟(التخطيــط 2)

http://www.facebook.com/no

te.php?note_id=42226420561

1&id=123311259918&ref=mf

مستنية ردودكوا ومنقشاتكوا

نهى بسيونى

25 – 1- 2010

أين أنا الان ؟ وما هو وضعى الحالى؟(التخطيــط 2)

النهاردة بقى عايزين نرد على سؤال من الأربعة اللى ف النوت اللى فاتت

التخطيط:

http://changeurlifenow.blogspot.com/2010/02/1.html

وهو

أنا فين دلوقتى ؟ وإيه هو وضعى حاليا؟

أولا عشان تعرف تروح أى مكان ف الدنيا (محدد أو غير محدد) لازم تعرف الأول إنت فين بالضبط .. عشان تعرف هتروح إزاى ومحتاج إيه مواصلات عشان تعرف تروح .. وكمان دا هيساعدك إنك مش بس توصل للمكان اللى عايز تروحله .. لأ دا كمان هيخليك تختار أقصر طريق للوصول ليه

وعشان تحدد إنت فين دلوقتى وايه وضعك ف الوقت الحالى ( وهو قبل أو أثناء عملية التخطيط) لازم تعرف اللى ليك واللى عليك

وأكتر الأساليب شيوعا وإستخداما ف معرفة اللى ليك واللى عليك حاجة بيسموها اللمحة السريعة أو الـ SWOT Analysis

الـ SWOT Analysis

بيستخدم هذا التحليل فى لمعرفة الظروف الخارجية والقدرات الداخلية لمؤسسة أو أفراد أو انت لوحدك .وهو عبارة عن تحليل جوانب

1- القوة عندك

2- الضعف عندك أو عند الأخرين اللى ممكن يكونوا مشتركين معاك ف نفس الهدف (لأن إنت ممكن تستخدم الطريقة دى ف مشروع مثلا بينك وبين اى شخص تانى بالتالى مش هتبقى نقطك لوحدك)

3- الفرص المتاحة ليك واللى هتستخدمها ف التحسين من نقاط القوة.

4- المخاطر أو الموعقات اللى ممكن تمنعك من تنفيذ اللى عايزه .

قبل ما نبتدى ف التحليل ..... إحــــــــــــــــــــــــ

ـذر

من إنك تقع ف ورطة وهى إنك تجامل نفسك أو تمدح فيها خليك واقعى وصادق مع نفسك.

أولا : نقط القوة :

وهى عبارة عن قدراتك الشخصية ومواهبك اللى ممكن تستفيد بيها ف العمل أو ف حياتك الخاصة

وممكن كمان تبقى مواهب وقدرات الناس اللى شغالة معاك

وكمان هى مميزات وحسنات اللى موجودة ف العمل

دلوقتى انت هتحاتج ورقتين وقلم واحد

الورقة الاولى : هتكتب فيها نقاط القوة اللى عندك انت

والورقة التانية : هتكتب فيها نقاط القوة عند غيرك سواء كانت الشركة او شخص تانى او مؤسسة تانية أو مجموعة اشخاص مع بعض.(دا لو فى أخرين داخلين ف أهدافك أو للى إنت بتخطط له)

طيب الورقتين دول هيتضمنوا إيه :

1- قدراتك ومهاراتك عندك أو عند غيرك (حسب الورقة اللى بتكتب فيها)

2- مواهبك ف العمل أو ف حياتك / مواهب الأخرين

أمثلة على نقط القوة :

1- مهارة ف الحوار مع الأخرين أو أسلوب خطابى كويس

2- خيال جيد

3- مجموعة أفكار غير مكتملة.

4- مستوى الإلتزام بالعمل كويس

على فكرة لو عملت الورقتين دول صح وبكل صدق .. هتحس أد إيه إنك أفضل مما تظن ف نفسك.

ثانيا : نقط الضعف:

هى عبارة عن الحاجات اللى إنت عايز تحسنها أو قادر إنك تحسنها أو على الأقل خالص عايز تتفادها فى خطتك

هنعمل نفس الكلام ف نقاط القوة

هتجيب ورقتين تانين (غير اللى فوق :D)

ورقة ليك وورقة للأخرين (قلنا لو فى أخرين)

الورق دا هيتضمن ايه :

1- الحاجات اللى محتاجة تحسين أو عايز تتفاداها

2- حاجات حاسس إنك ممكن تغيرها للأحسن

أمثلة على نقط الضعف :

1- الإصابة بالملل كل ما تشتغل ف حاجة من غير ما تكمل

2- فكرة ما ف دماغك بقالها كتير بس معملتش حاجة بيها لحد دلوقتى

3- مش منظم بشكل كويس بالتالى الناس بتشوفك إنك مش قادر تسيطر على حالك

4- بضيع وقت كتير ( كثير التسويف ... هبقى أعمل )

على فكرة ... كونك إنك تعرف نقط ضعف وتحددها بكل صدق فدى أول خطوة من خطوات إنك تحسن من نفسك ومن أداءك.

ثالثا:الفرص المتاحة :

ودى بتمثل الفرص الموجودة ف مجال نشاطك الحالى أو خارج نشاطك الحالى والحاجات اللى مأخدتهاش بعين الإعتبار قبل كدا.

على فكرة تحديد الفرص اللى متاحة ليك بتساعدك على إنك تقيم إزاى تقدر تطور نقط قوتك أكثر وتستعملها بشكل مفيد.

أمثلة على الفرص:

1- الكمبيوتر والإنترنت ممكن إستخدامهم ف التسويق والدعاية.

2- إستخادم الكمبيوتر فى تنظيم العمل.

رابعا: المخاطر أو المعوقات:

ودى الحاجات اللى ممكن تمنعك من إنك تنفذ اللى انت عايزه

وفى منها نوعين:

1- عوائق على المستوى الشخصى .

2- عاوئق على مستوى العمل.

على فكرة انك تعرف المخاطر والمعوقات اللى ممكن تنمعك من تنفيذ اللى انت عايزه .. دا بيخليك تقدر تحط خطط بديلة للطوارىء اللى ممكن تحصلك ودا هيقلل طبعا من تأثير الأزمات وبتخليك كمان تحاول تتجنب العوائق دى لأن محددها مسبقا

وأعرف إن العوائق بتبان دايما سيئة لو موجهناش

أمثلة على المخاطر والمعوقات:

1- عدم وجود المهارة المطلوبة.

2- عدم وجود منح دراسية.

3- ديون أو مشاكل مادية أو مشاكل ف السيولة أو عدم وجود دخل كافى ليك.

4- خوف من الفشل.

5- خوف من مواجهة الناس .

6- فريق العمل غير متعاون.

7- قضايا خلافية ف العمل.

بس كدا انت خلصت وقدرت تعرف إنت فين دلوقتى .وبكدا إنت جاهز عشان تاخد خطوة جديدة وهى إنك تبتدى تحط خطط لتحقيق أهدافك.

والتحليل دا تقدر تستخدمه ف أى وقت ولأى سبب حتى لو إنت وسط مراحل خطتك اللى بتنفذها مش بس ف مرحلة البداية.عشان كدا لازم تكرره بشكل دورى عشان تقدر تحدد التطوير اللى حصلك خلال الفترة اللى فاتت

المرة اللى جاية بقى هنرد على السؤال

أنا عايز أكون فين؟ وإيه هى طموحاتى المستقبلية؟

عشان نعرف إزاى نحدد أمنياتنا ونقدر نحولها لواقع ملموس متحدد ف أهداف عملية

نهى بسيونى

16 - 1 - 2010