التخطيط
تخيل حياتك من غير تخطيط شكلها هيبقى عامل إزاى
تخيل إنك عايش حياتك مش عارف انت عايز تعمل إيه .. ولا نفسك تحقق إيه
تخيل إنك عايش ومش مرتب وقتك ولا أحلامك ولا مخطط ليومك ولا إسبوعك ولا شهرك ولا أى حاجة
تفتكر لو إنت كدا هتكون مرتاح ف حياتك .. أو هتحس بالسعادة
طيب أقولك على فكرة أحسن .. تخيل بقى عكس كل الكلام اللى فات .. وقارن الفرق بين طريقة حياتك وهى متخططة وطريقة حياتك لو مش متخططة أو مش متخططة صح
طيب ما تيجوا كدا نفكر فى التخطيط شوية
أولا : يعنى إيه تخطيط:
هو النشاط اللى بينقلك من الوضع الحالى ليك للوضع اللى بتطمح ليه عن طريق وضع برنامج أوتصميم لأعمالك
على فكرة التخطيط دا مش شىء إضافى أو إختيارى ممكن تعمله ف حياتك وممكن لأ .. لأ دا حاجة ضرورية ف حياتك وضورية جدا كمان
ثانيا: إيه هى أهمية التخطيط :
1- هتخليك تحدد هدفك فى الحياة أو يوضحهالك.
2- هيخليك تستغل كل مواردك وطقاتك وإمكنياتك بصورة كويسة
3- هيخليك تنسق حياتك وتجعلها متكالمة أكتر
4- هيخليك تحدد أولوياتك اللى هتتفق مع إحتيجاتك
5- هتسيطر أكتر على المشاكل اللى ممكن تظهر فى مرحلة التنفيذ (اللى هى تعتبر من أهم المراحل)
6- هيقلل كمية المخاطر اللى ممكن تتوقعها
ثالثا:طيب واحد هيسأل ويقول طيب أنا هخطط لحياتى إزاى؟
هقولك تعمل إيه .. المفروض إنك هتعد مع نفسك كده فى هدوء ومنتهى التركيز ومعاك ورقة وقلم ( ودول مهمين جدا ... لأن لو مكتبتش كل اللى بتفكر فيه أكيد هتنسى ولو حاجة واحدة منهم .. فالأفضل الشخبطة بالقلم كده وتطلع كل اللى عندك ف الورقة) عشان ترد على كام سؤال كده مهمين أوى
طيب إيه هى الأسئلة دى :
1- أنا فين دلوقتى ؟ وإيه هو وضعى الحالى؟
2- أنا عايز أوصل لفين ؟ وإيه هى طموحاتى للمستقبل؟
3- إزاى أوصل للمرحلة دى؟وإيه هى الوسائل المطلوبة عشان أعمل دا؟
4- أهم سؤال بقى .. هو إزاى هعرف أنا حققت اللى عايزه ولا لأ .. ووصلت لحد فين من تحقيقه؟
هو دا التخطيط تفتكروا صعب إنك تعد مع نفسك وتعمل دا كله .. صعب إنك تصارح نفسك وترد على الأسئلة دى بوضوح عشان تقدر تحدد لنفسك طريقك وحلمك وطموحك اللى عايز تحققه .. وإنك تكون عايش عشان تعمل حاجة معينة مش عايش والسلام بدون أهداف ولا طموح
لو عجبكوا الكلام وعايزين تكملوا
هيكون فى ف المواضيع اللى جاية
إزاى ترد على نفسك ف الأسئلة دى .. وإزاى تحدد وضعك الحالى بشكل شامل ولأهم الجوانب وبأسلوب سهل .. وكمان هتقدر تقييم جوانب قوتك ونقط ضعفك عشان تعالجها .. وإزاى تحدد أمنياتك وتحولها لواقع ملموس وإزاى كمان ترتب أولوياتك فى تحقيق الأهداف والطموح دى .. وإزاى كمان تحدد القيم والمبادىء اللى بتؤمن بيها .. وكمان إزاى تنفذ بقى الخطة اللى هتحطها لنفسك وإنك تراقبها انت وصلت لحد فين وهل انت ماشى صح ولا لأ وازاى تواجه الطوارىء أو البدائل اللى ممكن تعمل ف حالات الطوارىء .. وإزاى تعرف هل إنت نجحت فى تحقيق أهدافك ولا
لو عجبك الموضوع إنتظروناااااااااااااا قريبا
ويا سلام بقى لو قلت رأيك :D
نهى بسيونى 13-1-2010
السلا علكيم
ردحذفشكرا يا نها على الموضوع بجد مفيد جداا .
انا بعمل كده كتييير بقعد مع نفسي علشان احدد اهدافى وعايزة ايه مش بعرف ؟!!! مش عارفه احدد اهداف محدده لحياتى بحب اعرف كذا حاجه وكل حاجه .لما بسأل نفسي عايزة ابقى ايه فى المستقبل بتكون الاجابة عايزة ابقى حد ناجح ولى شأن فى المجتمع . مجالى الكمبيوتر والبرمجه دخلته كده ةمعرفش عنه غير انى هدرس كمبيوتر وحبيته لان ليه مستقبل بحب السياسة جداااا ونفسي يبقى ليا دور سياسي بس مش شايفه نفسي سياسة بحب اكتب و بحب حاجات كتيييييييير بس عايزة ايه وايه نقاط قوتى مش عارفة !!!!!!!
موضوع جميل جدا ومختصر
ردحذفبس عموما الموضوع يختلف من شخص لآخر
وأحيانا الحيرة بتكون سبب مدمر
يعني انا مثلا محتار ادخل كمبيوتر ولا اتصالات ولا اكمل في قسم مدني زي معظم الناس ...... ربنا يهدي الجميع