بسم الله الرحمن الرحيم
عايزة أتكلم ف موضوع مهم جدا عند كل واحد مننا ..وهو تحديد أهدافنا وأحلمنا وطموحتنا وكل واحد بعد التخرج بيحلم بشغل ..طيب طبيعة الشغل دا إيه وإيه ميولى عشان أقدر أحدد أنا أقدر أشتغل ف ايه
الموضوع اللى هتكلم فيه بقى مكنتش متخيلة انه منتشرأوى للدرجة دى ..لكن لاقيته فعلا موجود عند ناس كتير وبالأخص الشباب طبعا
كل واحد يجى يحكيلك مشكلته ف الشغل والحياة يقولك
أنا مش عارف أشتغل ف إيه ... أنا مش بشتغل اللى بحبه .. أو أنا مش عارف أقدم ف أنهى شغل لأنى مش عارف أحدد أنا بحب إيه بس أنا بحب كذا وكذا وكذا
بس أنهى واحد اللى أمشى ف طريقه وأكمل للأخر
أكتشفت إن شباب كتير أوى مش عارفين يحددوا لنفسهم طريق.. بل وكمان خايف يمشى ف واحد منهم ليفشل فيه و يرجع يبتدى من الأول تانى
وإنهم دايما بيسألوا طيب إحنا نمشى ف أنهى طريق؟
أو نشتغل ف أنهى حاجة
خاصة لما تبقى ميولهم رايحة لحاجات ملهاش علاقة ببعض
سؤالى بقى
ليه الشباب مبقتش عارفة تحدد هدفها ..ايه اللى بتحبه وعايزة تكمل فيه من ضمن حاجات كتيرة بتحبها
ليه دايما بيتخيلوا إن الناس اللى هيسألوهم سؤال زى دا اللى هو انا أمشى ف أنهى اتجاه .. أنهم هيقدروا يحددوا ليهم هدفهم وان هما اللى هيقولولهم
اللى أنا عايزة أقول بقى لكل واحد من دول :
إنك انت الوحيد ف الدنيا دى اللى تقدر تحدد اهدافك صح .. وتمشى ف أنهى طريق .. وتشتغل ف أنهى مجال .. لأنها نفسية أكتر منها علمية .. ونفسية دى محدش هيقدر يتدخل فيها غيرك إنت لأنها نفسك إنت ومستقبلك إنت وميولك إنت ...
ممكن بس تستعين ببقيت الناس بإنك تجمع معلومات عن كل حاجة .. وتجمع عيوب كل مجال ومميزاته .. أسألة بس تعرفك معلومات عن كل حاجة
لكن متستناش من حد يحددلك طريقك
حدد انت لنفسك طريقك وحدد أهدافك وحدد لنفسك مستقبلك
ممكن بس تسأل إزاى اعمل دا ؟ وإزاى أحدد أهدافى ؟
بجد محتاجة أعرف رأيكم ف الكلام دا
هل فعلا دا موجود .. زى ما أنا شيفاه موجود وبكثرة كمان بين الشباب ف الفترة دى
هل فعلا انتوا مش قادرين تحددوا أهدافكوا ونفسكوا ف اللى يقولكوا إمشوا ف الطريق دا
وحدد أهدافك ف الطريق دا
ولا فى فى ناس تحاول تدور على أهدافها وطومحاتها وإزاى تقدر توصلها ... وبتجرب وممكن تمشى ف طريق وتفضل وتكمل وتحاول او تجرب وتدور على طريق تانى تمشى فيه لحد ما توصل ف النهاية للطريق الصح ولحلمها ولأهدافها الحقيقية .. وأكيد خلال التجارب دى بتكتسب خبرات ف كل حاجة .. ولو مكنتش خبرة مجال فهى خبرة تعامل مع الناس وخبرة فى اى حاجة تانية .. وأكيد بتخرج مستفيدة
نهى بسيونى
11 - 1- 2010
ليست هناك تعليقات:
إرسال تعليق